കൃഷാന്ത്‌ ആർ കെ സംവിധാനം ചെയ്ത ആവാസവ്യൂഹം എല്ലാ അർത്ഥത്തിലും അസാധാരണമായ ഒരു സിനിമയാണ്. നറേറ്റീവ് ശൈലി, പ്രമേയം, തിരക്കഥ എന്നീ മൂന്ന് തലങ്ങളിലും വ്യത്യസ്തത പുലർത്തുന്ന സിനിമ. പരീക്ഷണസിനിമകൾക്ക് മലയാളം അന്യമാണ് എന്ന ആരോപണത്തിനു എതിരെ ഉയർത്തിപ്പിടിക്കാൻ ഇതിലും മികച്ച ഒരു സിനിമ അടുത്ത കാലത്ത് ഇറങ്ങിയിട്ടില്ല എന്ന് പറയാം.
മികച്ച ചിത്രത്തിനും, തിരക്കഥയ്ക്കും ഉള്ള സംസ്ഥാന പുരസ്കാരങ്ങൾ നേടിയ ആവാസവ്യൂഹം, ഐഎഫ്എഫ്കെ -യിൽ പ്രദർശിക്കപെടുകയും ചർച്ച ചെയ്യപ്പെടുകയുമുണ്ടായി. ചിത്രത്തിൽ രാഹുൽ രാജഗോപാൽ, നിലീൻ സാന്ദ്ര, ഷിൻസ് ഷാൻ, ശ്രീനാഥ് ബാബു തുടങ്ങിയവരാണ് അഭിനയിച്ചിരിക്കുന്നത്. വിഷ്ണു പ്രഭാകറിന്‍റെ ഛായാഗ്രഹണവും, അജ്മല്‍ ഹസ്ബുള്ളയുടെ സംഗീതവും പ്രശംസ അർഹിക്കുന്നുണ്ട്.
പ്രകൃതിയും മനുഷ്യനും തമ്മിലുള്ള ബന്ധവും, മനുഷ്യൻ എന്ന ഒരൊറ്റ ജീവി വർഗം പരിസ്ഥിതിയിൽ ഏല്പിക്കുന്ന ആഘാതവുമാണ് സിനിമയിലെ പ്രമേയം. ഗൗരവതരമായ ഈ വിഷയം സംവിധായകനും തിരക്കഥാകൃത്തും അഭിനേതാക്കളും ചേർന്ന ടീം നമ്മളിലേക്ക് പകർത്തുന്നത് വ്യത്യസ്തവും നൂതനവുമായ ഒരു സറ്റയറിക്കൽ ശൈലിയിലൂടെയാണ്.
എറണാകുളം ജില്ലയിലെ പുതുവൈപ്പ് എന്ന പ്രദേശമാണ് ചിത്രത്തിന്‍റെ കഥാപശ്ചാത്തലം. കടലും കരയും ഒന്നുചേരുന്ന പ്രദേശത്തിനു പ്രധാനകഥാപാത്രനിർമിതിയിൽ പ്രാധാന്യം ഉണ്ട്. പശ്ചിമഘട്ടനിരകളിൽ അത്യപൂർവമായ ഒരു ഉഭയജീവിയെ കണ്ടെത്താനായി നടക്കുന്ന ശ്രമങ്ങളും വിചിത്രസ്വഭാവിയും ഉത്ഭവം എവിടെ നിന്നുമെന്ന് ആർക്കുമറിയാത്തവനുമായ ജോയി എന്ന കേന്ദ്ര കഥാപാത്രത്തിനു വേണ്ടിയുള്ള വേട്ടയും സമാന്തരമായി ചിത്രീകരിച്ചിരിക്കുകയാണ് ചിത്രത്തിൽ.
പക്കാ റിയലിസ്റ്റിക് ആയ രീതിയിൽ പറയുന്ന കഥയുടെ ഫ്രെയിം വർക്കിൽ മിത്ത് കലരുന്നത് തന്മയത്വത്തോടെയാണ്.രാഹുൽ രാജഗോപാൽ അവതരിപ്പിക്കുന്ന ജോയി എന്ന കഥാപാത്രത്തിന്‍റെ സരളപ്രകൃതവും മറ്റു മനുഷ്യർക്ക് മനസ്സിലാക്കാൻ സാധിക്കാത്തത്ര പ്രകൃതിയോട് അടുപ്പമുള്ള ജീവിതവുമാണ് കഥാതന്തു. അയാളുടെ ജീവിതം വരച്ചിടുന്നത് അയാളുമായി പോസിറ്റീവും നെഗറ്റീവും ആയ ബന്ധം സൂക്ഷിച്ചിരുന്ന നിരവധി ആളുകളുമായുള്ള അഭിമുഖങ്ങളിലൂടെയാണ്.
ഈ അഭിമുഖങ്ങളിൽ പാരിസ്ഥിതീക പ്രശ്നങ്ങൾ കടന്നു വരുന്നുണ്ട്, അതിന്‍റെ ആഘാതം എത്രയെന്നു കാണിക്കുന്ന ഡാറ്റാ ഉണ്ട്, ചൂഷണം ചെയ്യപ്പെടുന്ന അടിസ്ഥാനവർഗത്തിന്‍റെ ദുരവസ്ഥയുണ്ട്, രാഷ്ട്രീയമുണ്ട്, മനുഷ്യരാശി അഭിമുഖീകരിക്കാൻ പോകുന്ന ദുരന്തങ്ങളുടെ സൂചനകളുണ്ട്. ഇതെല്ലാം പറയുമ്പോഴും കഥയുടെ ഗതിയിൽ നിന്ന് പ്രേക്ഷകന്‍റെ ശ്രദ്ധ വ്യതിചലിക്കാതെ നോക്കുന്ന രസകരമായ ആഖ്യാനമാണ് സിനിമയിലേത്.
ചുരുക്കത്തിൽ, ആവാസവ്യൂഹം നർമ്മബോധത്തോടെ അവതരിപ്പിച്ച, നമ്മെ പിടിച്ചിരുത്തുന്ന ഒരു സിനിമയാണ് എന്നു പറഞ്ഞു മറന്നു കളയാവുന്ന ഒന്നല്ല. നമ്മുടെയുള്ളിൽ സിനിമ ഉണർത്തുന്ന പാരിസ്ഥിതികബോധത്തിന്‍റെ, വരാനിരിക്കുന്ന വിനാശകാലത്തെ പറ്റിയുള്ള മുന്നറിവിന്‍റെ ആഘാതം ഒട്ടുമേ ലഘുവല്ല.
PHOTO CREDIT: KRISHAND FILMS
Affiliate Disclosure: Some of the links or advertisements in the wordket website are affiliate links or advertisements, meaning, at no additional cost to you. We will earn a commission, if you click through and make a purchase. Thank you 🙂
