വെയിൽചിത്രം

നിലാവിൽ വിരൽ തൊട്ട്
ഞാൻ നിന്നെ വരയ്ക്കാൻ നോക്കുകയായിരുന്നു..
നിൻ്റെ കണ്ണുകൾ വരയ്ക്കാൻ
കടലിൻ്റെ നീലിമ തിരയുകയായിരുന്നു..
നിൻ്റെ ചിരി വരയ്ക്കാൻ
ഇളം വെയിലിൻ്റെ നിറഭേദങ്ങളും..
അപ്പോൾ എൻ്റെ മാറിൽ നിന്ന് മുഖം മാറ്റിക്കൊണ്ട്,
പാൽത്തുള്ളി പറ്റിനിൽകുന്ന ചുണ്ടുവിടർത്തി,
എൻ്റെ കണ്ണുകളിലേക്ക് നോക്കി നീ ചിരിച്ചു
കണ്ണുകൾ നിറയുന്നത് വരെ തിരിച്ചു ഞാനും..
കണ്ണുതട്ടാ കരിംപൊട്ടുള്ള നിൻ്റെ നനുത്ത കവിളിൽ ചുവപ്പ് പടർന്നു
കുഞ്ഞുവിരലുകൾ എൻ്റെ ചുണ്ടിലേക്കുയർന്നു..
കുഞ്ഞിക്കാലുകൾ വായുവിൽ
എനിക്കു കേൾക്കാത്ത പാട്ടിനു ചുവടുകൾ വച്ചു..
ചിത്രം വരച്ചുതീരുന്നതിന് മുൻപേ…
സ്വപ്നത്തിൽ നിന്നുണർന്നുപോയി..
നീ എന്നിൽ നിന്നും ഏറെ ദൂരത്തായിരുന്നു
നീ ഒത്തിരി വലുതായിപ്പോയിരുന്നു..
ഇളംവെയിൽപോലത്തെ ചിരി മാത്രം
മാറാതെ നിന്നു….

PIXABAY